Semeıdegi «Qazelektromontaj-S» AQ jumysshylary 9 aı jalaqy almaǵan
SEMEI. QazAqparat - Semeıdegi «Qazelektromontaj-S» aktsıonerlik qoǵamynynyń jumysshylary 9 aı jalaqysyz júr. Búginde kásiporynnyń qyzmetkerleri aldyndaǵy jalpy qaryzy 57 mln teńgege jetken, dep habarlaıdy QazAqparat.
Mańdaı terimen tapqan jalaqysyn ala almaı júrgen 115 jumysshynyń kúte-kúte tózimi taýsylǵan. Tipti kásiporyndy sotqa berip, jeńip shyqqan. Ótken jyldyń qarashasynda zańdy kúshine engen sot sheshiminen keıin eńbekaqymyzdy alamyz dep qýanǵan. Alaıda áli kúnge deıin tek kútýmen keledi.
Kásiporynnyń dırektory Eldar Baıkanovtyń sózinshe, tapsyrys berýshi kompanııa «Qazelektromontaj-S» aktsıonerlik qoǵamynynyń atqarǵan jumystaryna aqsha tólemeı, qurdymǵa ketken. Osylaısha, 600 mln. teńge qaryzyn qaıtarmaǵan eken.
«Bas merdiger «Isis Injınırıng» kásiporny mekemesin sotqa berdik. Sebebi, bizdiń «Aqtoǵaı» taý-ken baıytý kombınatynda atqarǵan jumystarǵa aqsha tólemedi. Sotta jeńip shyqsaq ta biz kásipornymyzdy bankrot dep tanı almadyq. Búginde barlyq shottarymyz buǵattalǵan. Memlekettik tenderge de qatysa almaı otyrmyz. Jalaqy almaǵan soń kóp jumysshylar jumysqa kelýden bas tartty. Osylaısha josparlanǵan jumystar da toqtady», - deıdi Eldar Baıkanov.
Jumysshylardyń máselesin sheshýge qala basshylyǵy da kirisken. Búginde kásiporynǵa jańa ınvestor tabyldy. Endi jekeniń qolyna ótip jatyr. Osylaısha jylǵa jýyqtaǵan máseleni ınvestor óz qarajaty esebinen sheshpek. Búginde jumysshylardyń qaryzyn qaıtarý týraly tizim jasalǵan. ıAǵnı, qaryzdyń 50 paıyzyn 11-shi aqpanǵa deıin, al 22-shi naýryzǵa deıin jumysshylar aldyndaǵy qaryz tolyq óteledi dep josparlanýda.
«Sot arqyly kompanııanyń bankrot bolǵanyn dáleldeý kerek. Bul úshin ýaqyt kerek. Sondyqtan ınvestor arqyly, jumysty qaıta bastaý kerek», - dedi qala ákimi Ermak Sálimov.
Aıta keteıik, 1964 jyly jumysyn bastaǵan kásiporyn elektr jelilerin taratady. Sondaı-aq Qazaqstan boıynsha joǵary deńgeıli elektr jabdyqtaryn ornatýmen aınalysady.
