Semeıdegi qazandyqtardy kúrdeli jóndeý jylytý maýsymyna deıin aıaqtalýy tıis – Álıhan Smaıylov
Úkimettiń resmı saıtynyń jazýynsha, «Ǵabbasov» qazandyǵy Semeıdiń ortalyǵynda ornalasqan. Qysqy maýsymda 66 kópqabatty jáne 138 jeke turǵyn úıdi, 39 bıýdjettik mekemeni, 10 áleýmettik jáne 140 kommertsııalyq nysandy jylýmen qamtamasyz etedi. Qazir munda qaıta jóndeý jumystary júrip jatyr, jańa jylytý kezeńi bastalǵanǵa deıin aıaqtaý josparlanǵan.
Premer-Mınıstr qalany jylýmen qamtý máselelerin sheshý úshin Óńirdi damytýdyń keshendi josparyna jylý kózderin rekonstrýktsııalaý boıynsha 11 joba engizilgenin aıtty. Atap aıtqanda, «Ǵabbasov» jáne «Ortalyq» qazandyqtaryn rekonstrýktsııalaý jylý rejımin jaqsartýǵa, halyqqa kórsetiletin qyzmetterdiń sapasy men senimdiligin, qalanyń ekologııalyq ahýalyn jaqsartýǵa jáne jylý shyǵynyn azaıtýǵa múmkindik beredi.
«Semeı qarqyndy damyp keledi. Halyq sany artyp, jańa obektiler men turǵyn úıler salynyp jatyr. Nátıjesinde, qaladaǵy jylytý kózderine túsetin júkteme jyldan jylǵa arta túsedi. Bıyl «Ǵabbasov» jáne «Ortalyq» qazandyqtaryn qalpyna keltirýge bıýdjetten 1 mlrd teńge, jylý jelilerine 3,5 mlrd teńge bólindi. Ákimdik kelesi jylytý maýsymy bastalǵanǵa deıin barlyq jumystyń sapaly júrgizilýin qamtamasyz etýi kerek», — dedi Álıhan Smaıylov.
Ol búginde JEO-3 salý máselesi pysyqtalyp jatqanyn aıtyp, jobany ári qaraı qarjylandyrý úshin osy jyly tehnıkalyq-ekonomıkalyq negizdemeni aıaqtaý mańyzdy ekenin atap ótti.
Sondaı-aq Premer-Mınıstr Semeı qalasynyń sımvolyna aınalǵan Ertis ózenindegi aspaly kópirge bardy. Onyń uzyndyǵy – 1086 metr, eni – 35 metr. Kópir 2000 jyldyń kúzinde paıdalanýǵa berildi, bul qala ishindegi jáne elimizdiń kúre joldaryndaǵy qozǵalysty jeńildetýge múmkindik berdi. Qazirgi ýaqytta obektini keshendi rekonstrýktsııalaý boıynsha jobalyq-smetalyq qujattar ázirleý josparlanǵan.
Álıhan Smaıylov Semeıdiń strategııalyq kólik baǵyttarynyń torabynda ornalasqanyn, sondyqtan jol sapasyn arttyrý qalanyń jáne búkil óńirdiń damýy úshin mańyzdy ekenin atap ótti. Bıyl bul maqsattarǵa respýblıkalyq bıýdjetten 7 mlrd teńgeden astam qarjy bólindi.
«Ákimdik josparlanǵan barlyq jobanyń ýaqytyly oryndalýyn qamtamasyz etýi kerek. Jalpy Úkimet Abaı óńirin damytý boıynsha bes jyldyq keshendi jospar bekitti. Onyń aıasynda óńirdiń odan ári damýyna serpin beretin turǵyn úı-kommýnaldyq, áleýmettik jáne energetıkalyq ınfraqurylymdy jańǵyrtý jáne salý boıynsha is-sharalar qarastyrylǵan», – dedi ol.
Sondaı-aq Úkimet basshysyna Semeı qalasynyń bas jospary jáne qalanyń sol jaǵalaýyndaǵy 72 gektar aýmaqtaǵy eski úılerdi súrý jáne onyń ornyna salynatyn qurylys jumystary týraly sharalar tanystyryldy.
