Semeıdegi ishki joldardyń 50 paıyzy jóndeýden ótedi
SEMEI. QazAqparat – Semeı qalasynda kelesi jyly qala ishindegi joldardyń 50 paıyzy jóndeledi, dep habarlaıdy QazAqparat tilshisi.
Bul jaıly Shyǵys Qazaqstan oblysynyń ákimi Danıal Ahmetov Facebook-tegi paraqshasynda jazdy.
«Óskemende jol-kólik ınfraqurylymyn damytýdyń birinshi kezeńi aıaqtalýda. Osydan tórt jyl buryn oıǵa alǵan josparlarymyzdyń barlyǵy oryndaldy. Qazir «Almaty-Óskemen» tasjolyna shyǵatyn І.Esenberlın kóshe jolynyń qurylysyn aıaqtap qaldyq. Samar kúrejolyna baǵyt alatyn Q.Sátpaev kóshesiniń qurylysy máresine jetti. Ponton kópirinen Menovnoe aýylyna deıingi joldy jóndeý birshama sozylyp ketkeni ras. Esesine atalmysh eldi mekenniń ishindegi júrý bóligi keńeıtildi», - dedi ol. ⠀
Aımaq basshysynyń aıtýynsha, 2022 jyly Semeıdiń kóshelerin kúrdeli qaıta jańartý qolǵa alynbaq. Qala ishindegi joldardyń 50 shaqyrymy jóndeledi. Sondaı-aq aınalma jol qurylysyna basa mán beriledi.
«Taǵy bir mańyzdy joba – Shemonaıha aýdanyndaǵy kópirdi qaıta jańartý. Qazir bul kópirden ótý kópshilikke qıyndyq týdyrýda. Jańartylǵannan keıin másele tolyq sheshimin tabady. Bul rekonstrýktsııalaý jobasy aıryqsha mańyzy bar «Almaty-Óskemen-RF shekarasy» jolyna shyǵatyn tranzıttik baǵyttyń bir bóligi. Osylaısha, Shyǵys Qazaqstan oblysynyń iri qalalarynda jáne basqa da eldi mekenderinde halyqtyń ómir súrý sapasyn jaqsartý úshin jol ınfraqurylymyn damytý boıynsha aýqymdy jumys júrgizilýde», - dedi Danıal Ahmetov.
