Semeıdegi hospıste naýqastarǵa oryn jetispeıdi
SEMEI. QazAqparat - Semeıde ashylǵan «Hospıs» 1 jyl ishinde óńirdiń 541 turǵynyna pallıatıvtik medıtsınalyq kómek kórsetti. Alaıda búginde oryn jetispeýshiliginen naýqastarǵa dálizde em kórsetilip jatyr, dep habarlaıdy QazAqparat.
Aıta keteıik, Semeıde atalmysh mekeme álemge áıgili "Delo bolshee, chem Chernobyl" qoǵamdyq qorynyń bas dırektory Fıona Korkorannyń basshylyǵymen ashylǵan bolatyn. Aýyr halde jatqan naýqastarǵa úı jaǵdaıynda kútim kórsetý qıyn. Sondyqtan «Hospıs» bul jaıtty ózgertý úshin ashylǵan.
Mekemeniń jyl ishinde atqarǵan jumysymen tanysýǵa qalalyq qoǵamdyq keńes ókilderi bardy.
Munda medıtsınalyq kómek emdelmeıtin aýrýǵa shaldyqqan naýqastarǵa kórsetiledi. Atap aıtqanda, qaterli isikke shaldyqqan, arnaıy em sharadan keıin dárilik ońaltýdy qajet etetin, sozylmaly aýrýlary bar, ınfarkt alǵan, qan qysymy únemi kóteriletin syrqattarǵa.
Búginde mekeme zamanaýı medıtsınalyq jabdyqtarmen qamtamasyz etilgen. Naýqastarǵa qajetti barlyq jaǵdaı jasalǵan.
«Mekeme aýyr jaǵdaıda jatqan naýqastardyń ómir súrý deńgeıin jaqsartý úshin ashylǵan. Búgingi kúni barlyq medıtsınalyq qondyrǵylar men qural-jabdyqtarmen tolyq jabdyqtalǵan. Árbir palatada fýnktsıonaldyq tósekter, arbashalar, tósekke qoıylatyn ústelder, bakterıtsıdti lampalar bar. 4 ýaqyt tamaqpen qamtamasyz etiledi. Eger naýqas ózi tamaq ishe almasa medbıkeler tamaqtandyrady»,-dedi «Semeı qalasynyń Hospısi» dırektory Ǵalııa Jýasbaeva.
Qazirgi kúni mekemedegi basty másele - oryn tapshylyǵy. Tek 30 adamǵa jasaqtalǵan. Alaıda munda keletin naýqastardyń sany kóp. Sondyqtan dárigerler keıbir naýqastarǵa dálizde em kórsetýde.
Jalpy hospıstiń jumysymen tanysqan qalalyq qoǵamdyq keńes músheleri mekemeniń atqaryp jatqan jumysyna oń baǵa berdi.
