Semeıdegi «Ertis» stadıonynyń ornyna mektep salynbaq

SEMEI. QazAqparat – Semeı qalasyndaǵy «Ertis» stadıonynyń ornyna mektep salý josparlanyp otyr, dep habarlaıdy QazAqparat tilshisi.

Qalalyq Aqparat ortalyǵynyń málimetine súıensek, qazirgi ýaqytta stadıon jeke kásipkerge tıesili.

Semeı ákiminiń orynbasary Dımıtrıı Garıkovtyń aıtýynsha, ázirshe stadıon memleket úlesine alynbady. Osyǵan oraı menshik ıesinen jerdi qaıtaryp alý máselesi qarastyrylýda.

«Menshik ıesiniń jerdi jalǵa alý merzimi 2024 jyly aıaqtalady. Soǵan deıin stadıon jumys isteı beredi. Qazir jer ýchaskesin qaıtaryp alý sharasy jobalyq-smetalyq qujattamany ázirleý úshin qajet. Jobalaý protsesi aıaqtalǵan soń ǵana tıisti qarjy bólinip, mektep qurylysy bastalady», - dedi Dımıtrıı Garıkov.

Alaıda menshik ıesi buǵan qarsylyq tanytýda. Óz sózinde ol stadıondy saqtap qalǵysy keletindigin jetkizgen. Ákimdik pen kásipker arasynda kelissózder jalǵasýda.