Semeıdegi eki balanyń ákesine oq atqan jigittiń esi aýysqan bolyp shyqty
ÓSKEMEN. QazAqparat - Semeı qalasyna jaqyn mańdaǵy aýylda óziniń kórshisin atyp óltirgen jigitke qatysty sot sheshimi shyqty, dep habarlaıdy «QazAqparat» HAA tilshisi.
Atalǵan qylmys boıynsha sot isi Shyǵys Qazaqstan oblysy qylmystyq ister jónindegi mamandandyrylǵan aýdanaralyq sotynda qaraldy. Sot materıaldaryna sáıkes, kúdikti aýyr psıhologııalyq syrqatpen (paranoıdty shızofrenııa) aýyrǵan. Araqqa sylqııa toıyp alyp, eki kórshisimen ursysyp qalǵan ol óziniń úıiniń esigin tars jaýyp alǵan. Alaıda janjaldasqan jigittiń biri onyń aýlasyna kirip, aıǵaılap, úı qojaıynynyna til tıgize bastaǵan.
Kóp oılanbastap, úı qojaıyny tyǵyp qoıǵan qarýyn alyp shyǵyp, kórshisin atyp óltirgen.
Aıyptalýshy úıinde jalǵyz turǵan. Jyl saıyn arnaıy emdeý mekemesinde birneshe aı boıy emdelip júrgen. Saý kezinde eshkimge soqtyqpasa da, spırtti ishim dik ishken kezinde kórshileriniń mazasyn alýdy ádetke aınaldyrypty.
Janjal bolar kúni ol «tentek sýdan» iship alyp, kóshege shyǵyp aıǵaılaı bastaǵan. Kórshileri basý aıtsa da, kónbegen kórinedi. Oqıǵa ornynan kezdeısoq ótip bara jatqan jas kórshisi (ol da mas bolǵan) kıkiljińge aralasyp ketip, ony qorqyta bastaǵan. Aıyptalýshy jasqanyp, úıine qashyp kirgenge uqsaıdy. Bári tarap ketkenimen, ótip bara jatqan jas jigit úı aýlasyna kirip, qorqytýyn qoımaǵan. Aqyry, buǵan shydamaǵan úı qojaıyny ákesinen qalǵan qarýdy alyp shyǵyp, eregestiń sońy ólimmen aıaqtalǵan.
Sot aıyptalýshyny isine jaýap berýge qabiletsiz dep tanyp, mamandandyrylǵan tıptegi aýrýhanada jiti baqylaýmen kúshtep emdeý týraly qaýly shyǵardy.
Qaıtys bolǵan jigittiń artynda áıeli men eki balasy qaldy.
