Semeıdegi Bıoortalyq qasqyr talap óltirgen sileýsinge qatysty túsinikteme berdi

Semeıdegi kópqabatty úılerdiń biriniń jertólesinen sileýsin tabylǵanyn buǵan deıin jazǵan bolatynbyz. Qutqarýshylar ony ustap, Bıologııalyq ortalyqqa jetkizdi. Keıin haıýandy qasqyr talap óltirgeni anyqtaldy.

Búgin qalalyq aqparat ortalyǵynda ótken baspasóz máslıhatynda Valerıı Dıadov sileýsin bul ortalyqta bir kúnnen artyq ustalmaýy tıis bolǵanyn atap ótti. Alaıda, basqa jerlerde bos orynnyń tabylmaýyna baılanysty, ol jabaıy ańdar turatyn orynnan jeke úıshikke ornalastyrylǵan.

«Sileýsinge et torkóz arqyly tastalyp otyrdy. Arnaıy oryn bolmaǵandyqtan qasqyrdy da eki aralyq arqyly tamaqtandyrýǵa týra keldi. Arada 5 kún ótse de, sileýsinge jańa oryn tabylmady. 31 qańtar kúni keshki tamaqtandyrý kezinde úıshiktegi sileýsin kiretin esiktiń torkózinen aıaǵyn shyǵaryp qalǵanda, tamaqtanyp jatqan qasqyr kózilespes jyldamdyqpen onyń aıaǵynan bas salyp, jaýyryn tusyna deıin tartyp qalady. Sileýsin sol mezette-aq ólip ketken. El arasynda «qasqyr ash, aryq boldy. Sol sebepti sileýsindi bas saldy degen» qaýeset taraýda. Bul – jalǵan sóz. Qasqyr únemi kútimde. Biraq jyrtqyshtyń aty jyrtqysh qoı» – deıdi V. Dıadov.

Onyń aıtýynsha, sileýsinniń ne sebepti aıaǵyn suqqany túsiniksiz. Bul oqıǵaǵa ortalyq qyzmetkerleri emes, sol jerge kelýshiler kýá bolǵan.

«Bizdiń qoldan keler sharamyz bolmady. Eger sol torǵa adam kirse, qasqyr oǵan da atylatyn edi. Negizinen sileýsindi bar bolǵany bir kún ustaýymyz tıis edi. Men osyny aıtyp, tabıǵatty qorǵaý polıtsııasyna da bardym. Biraq bul másele sheshilgenshe qasqyr sileýsindi talap óltirdi» – deıdi bıologııalyq ortalyq dırektory.

Áleýmettik jeli qoldanýshylary jabaıy ańdy «nege bıoortalyqqa alyp bardy? Jyrtqyshty bostandyqqa jiberý kerek edi» degen syńaıdaǵy pikirler bildirýde. Al mamandardyń sózinshe, sileýsindi ormanǵa jiberý – qaýipti. Sebebi bir aıdan astam ýaqyt qala ishinde óz tamaǵyn ózi taýyp jeýge úırengen jyrtqysh jaqyn mańdaǵy eldi mekenderge túsýi múmkin edi.