Semeıdegi az qamtylǵan otbasylar áleýmettik paket alýda
2020 jyldyń qańtar aıynan bastap Úkimet az qamtylǵan otbasylardy qoldaýdyń jańa túrin engizdi. AÁK alatyn januıalarǵa taratylatyn kepildendirilgen áleýmettik pakette 1 men 6 jas aralyǵyndaǵy balalarǵa azyq-túlik pen turmystyq hımııa taýarlary kiredi. Semeıde birinshi toqsanda 4 108 balaǵa osyndaı paket berilgen.
«Qańtarda 1336 otbasy áleýmettik paket aldy, onyń ishinde 1 jastan úsh jasqa deıingi 1011 bala jáne úsh jastan alty jasqa deıingi 143 bala bar. Gıgıena zattary 2 054 balaǵa berildi. Áleýmettik pakettiń quramy balanyń jasyna baılanysty ózgerip otyrady. Mysaly, azyq-túlikter búldirshinniń jas erekshelikterine oraı kerekti dárýmenderdi eskere otyryp jasalady», - deıdi qalalyq jumyspen qamtý jáne áleýmettik baǵdarlamalar bóliminiń basshysy Murat Kýrjıkaev.
Búginde aqpan-naýryz aılaryna arnalǵan áleýmettik paketterdi taratylýda. Paketter ár otbasynyń úıine deıin jetkizilýde. Ekinshi toqsanǵa qujattardy qabyldaý 1 sáýirden bastalmaq. Jalpy, ótken jylmen salystyrǵanda qalada AÁK alýshylar sany azaıǵan. Bıyl ataýly áleýmettik kómek 2061 adamǵa taǵaıyndaldy. Bul kórsetkish byltyrǵy jylmen salystyrǵanda eki esege tómen. Osyǵan AÁK alý erejeleriniń ózgerýi jáne jekelegen sanattardaǵy azamattardyń 1 qańtardan bastap jalaqylarynyń ósýi sebep bolyp otyr.
Áleýmettiń áljýaz toptaryna kórsetiletin kómek tek bul ǵana emes. Atap aıtqanda, 6 jastan 18 jasqa deıingi balalar mektepte tegin tamaq, kıim jáne keńse taýarlarymen qamtamasyz etilgen. Sonymen qatar 5 naýryzdan bastap qala ákiminiń sheshimimen az qamtylǵan jáne kópbalaly otbasydan shyqqan balalar men jetimder qoǵamdyq kólikterde tegin júrýde.
