Semeıdegi ataýy joq dańǵylǵa Nursultan Nazarbaev esimi beriletin boldy
Búgin shahar basshysy Nurymbet Saqtaǵanovtyń qatysýymen qalalyq máslıhattyń kezekten tys besinshi sessııasy ótti. Otyrys barysynda tórt másele qaraldy. Alǵashqy úsheýi vedomstvoaralyq komıssııalardyń quramy jóninde bolsa, tórtinshisi – Qaraǵaıly jańa yqshamaýdanyndaǵy dańǵylǵa Tuńǵysh Prezıdenttiń esimin berý jaıly bolǵan.
Dańǵyl Qaraǵaıly aýdanyndaǵy «Semeı-Pavlodar» tasjolynan bastaý alady. Sol jaǵynda kópsalaly mádenı-sport kesheni, Nazarbaev Zııatkerlik mektebi, al oń jaǵynda jańadan boı kótergen turǵyn úıler men balabaqsha ornalasqan.
«Bolashaqta muz aıdyny keshenin, bilim jáne tehnologııalar transferi mektebin ashý josparlanýda. Serýendeý aýmaqtary, qoǵamdyq tamaqtaný oryndary, balalarǵa arnalǵan oıyn jáne sport alańdary salynbaq. Budan bólek, óshelerdi jaryqtandyrý, oryndyqtar, qoqys jáshikterin jáne shaǵyn sáýlet nysandaryn ornatý qarastyrylǵan», - dedi Semeı qalasynyń ákimi Nurymbet Saqtaǵanov.- Atalǵan dańǵyldyń ataýy berilmegen.
Sessııa barysynda barlyq másele boıynsha sheshimder biraýyzdan qabyldandy. Endi Qaraǵaıly kóshesine ataý berý týraly túpkilikti sheshimdi respýblıkalyq onomastıkalyq komıssııa qabyldaıdy.
