Semeıdegi aspaly kópirdiń astyna jańa demalys orny salynbaq
Abaı oblysy ákimdiginiń málimetine súıensek, jańa demalys ornyna aınalatyn aspaly kópirdiń asty tolyqtaı kógaldandyrylady. Alańnyń jalpy aýdany – 3500 sharshy metr. Barlyq jumystar demeýshilerdiń qarajatyna júrgiziledi.
Onda strıt-art, skeıt-park jáne parkýr men vorkaýt sport alańdary salynbaq. Kópir asty aýmaǵynyń artyqshylyǵy - kez-kelgen aýa-raıyna qolaıly. Jańbyrdan nemese kún sáýlesinen jasyrynyp, qalaǵan ýaqytta sportpen aınalysyp, demalýǵa bolady.
Aımaq basshysy Nurlan Uranhaevtyń aıtýynsha, Semeı turǵyndary men qonaqtary úshin birqatar demalys ornyn qurý josparlanǵan.
«Bıyl 12 jańa oryn qurý josparlanyp otyr. Demalys orny birinshiden, adamnyń mádenıetin qalyptastyrady. Taza, ádemi, abattandyrylǵan jerdi eshkim lastaǵysy kelmeıdi. Ekinshiden, buryn qaraýsyz qalǵan jerler shahar turǵyndarynyń kóńilinen shyǵatyn orynǵa aınalýy tıis. Biri onda kofe ishedi, ekinshisi balalaryn oınatady, al basqalary taza aýada sportpen shuǵyldanady», - dedi ol.
