Semeıdegi áskerı bólimnen 9 mln teńgeniń azyq-túligin urlaǵan serjant sottaldy
ÓSKEMEN. QazAqparat – Semeı garnızonynyń áskerı sotynda 9 mln teńgeniń azyq-túligin urlaǵan serjanttyń isi qaraldy, dep habarlaıdy QazAqparat.
Sot barysynda anyqtalǵandaı, áskerı bólimniń azyq-túlik qyzmet qoımasynyń bastyǵy 2018 jyldyń qyrkúıeginen 2019 jyldyń mamyryna deıingi aralyqtaǵy 3 900 azyq-túlik jıyntyǵyn jymqyrǵan. Ony «esepten shyǵaryldy» dep áriptesterine satqan,
«Osylaısha qoımadan 8 951 022 teńgeniń ónimi qoldy bolǵan. Sot barysynda taraptar protsessýaldy kelisimge keldi. Áskerı qyzmetshi QR QK-niń 189-baby 3-bóliginiń 1-tarmaǵymen kináli dep tanylyp 3 jyl 6 aıǵa bas bostandyǵy shekteldi. Sondaı-aq ol «serjant» áskerı sheninen aıyryldy. Úkim áli zańdy kúshine engen joq», - dep habarlady sottyń baspasóz qyzmeti.
