Semeıdegi Álıhan Bókeıhanovtyń eskertkishi mádenı mura tizimine engizildi
Osy jyldyń naýryz aıynda Semeıdiń tarıhı-mádenı obektilerin saqtaýdyń 2021-2025 jyldarǵa arnalǵan jol kartasy bekitilgen. Soǵan sáıkes, 9 tarıhı jáne mádenı eskertkishti jóndeý, qalpyna keltirý josparlanyp otyr. Bul týraly baspasóz konferentsııasy barysynda qalalyq mádenıet jáne tilderdi damytý bóliminiń basshysy Nazerke Aqqojına málimdedi.
«T.Káýkenov meshiti, Metız-fýrnıtýra zaýytynyń ǵımaraty, Nasos stantsııasy, Órt sóndirý deposy, Sport mektebi, gýbernator úıi (qazirgi oblystyq tarıhı-ólketaný murajaıy), poshtashy Lıpýhın úıi (F.Dostoevskıı ádebı-memorıaldyq úı-murajaıy), Nevzorovtar otbasy mýzeıi jáne bir munaraly meshitke qalpyna keltirý jumystaryn júrgizý kózdelgen. Sonymen qatar ShQO ákimdiginiń qaýlysymen Máńgilik el men Shýgaev kósheleriniń qıylysyndaǵy Jeńis saıabaǵynda ornalasqan Álıhan Bókeıhanovtyń eskertkishi mádenı mura eskertkishter tizimine engizildi», – dedi ol.
Qalanyń taǵy bir mańyzdy nysany - Uranhaev kóshesi, 17 mekenjaıynda ornalasqan 1873 jyly salynǵan burynǵy áıelder gımnazııasynyń ǵımaraty. Búgingi tańda ǵımarattyń menshik ıesi - «Semey mall» JShS. Osy jyldyń 25 aqpanynda onda tarıhı-mádenı saraptama júrgizý bastamasy kóterilgen.
«Tarıhı-mádenı murany qorǵaý jónindegi oblystyq komıssııasynyń sheshimimen atalǵan ǵımaratqa jergilikti mańyzy bar tarıh jáne mádenıet eskertkishi mártebesin berý maquldandy. Komıssııa sheshimi QR Mádenıet jáne sport mınıstrligi janyndaǵy arnaıy komıssııaǵa kelisýge jiberildi», - dedi bólim basshysy.
