Semeıdegi jumysshynyń qazasy: kásipker men mashınıske sot úkimi shyqty
SEMEI. KAZINFORM – Semeı qalasyndaǵy qylmystyq ister jónindegi aýdanaralyq sotta kásiporynda kóz jumǵan jumysshyǵa qatysty qylmystyq is boıynsha úkim shyqty.
Sotta jeke kásipker men avtogıdrokótergish mashınısine qatysty qylmystyq is qaraldy. Olarǵa QR QK-niń 156-baby 3-bóligi boıynsha (Eńbekti qorǵaý erejelerin buzýdyń adam ólimine ákelip soǵýy) aıyp taǵylǵan.
Іs materıaldaryna sáıkes, qaıǵyly oqıǵa ótken jyldyń sáýir aıynda Semeıdegi kásiporyn aýmaǵynda bolǵan. Arnaıy oqytýdan ótkizilmeı, tıisti ruqsatsyz jumysqa tartylǵan jumysshy bıik jerde eńbek etý kezinde aýyr jaraqat alyp, aýrýhanada kóz jumǵan.
Tergeý barysynda anyqtalǵandaı, aıyptalýshylar qaýipsizdik talaptarynyń saqtalýyn qamtamasyz etpeı, biliktiligi men jeke qorǵanys quraldary joq adamdy jumysqa jibergen.
– Sot aıyptalýshylardyń is-áreketterinde QR Qylmystyq Kodeksiniń 156-baby 3-bóliginde kózdelgen qylmys quramynyń bar ekenin anyqtady. Olardyń kinási tolyq dáleldendi, - dep habarlady sottyń baspasóz qyzmetinen.
Sot úkimimen 2 sottalýshyǵa eki jyl bas bostandyǵynan aıyrý jazasy taǵaıyndaldy. Alaıda «QR Konstıtýtsııasynyń 30 jyldyǵyna baılanysty amnıstııa týraly» zańǵa sáıkes, olar qylmystyq jaýapkershilikten bosatyldy.
Budan bólek, sot jábirlenýshi taraptyń azamattyq talabyn ishinara qanaǵattandyryp, sottalýshylardy moraldyq zııan retinde 10 mln teńge tóleýge mindettedi. Úkim áli zańdy kúshine engen joq.
Eske salsaq, osyǵan deıin Almatyda kólikterdi zańsyz tirkeý isi boıynsha úsh adam sottalǵany habarlanǵan.