Semeıdegi jylý maýsymyna daıyndyq ne sebepti keshikti
ASTANA. KAZINFORM – Qazaqstanda jylý berý maýsymy 11 óńirde bastaldy. Qalǵan oblystarda jylytý júıeleri aýa raıyna baılanysty qazan aıy ishinde kezeń-kezeńimen iske qosylady. Bul týraly Úkimet otyrysynda Premer-mınıstrdiń birinshi orynbasary Nurlybek Nálibaev málimdedi.
Onyń aıtýynsha, qazirgi ýaqytta respýblıkadaǵy barlyq jylý kózderi kúzgi-qysqy kezeńge daıyn. Energııa óndirýshi nysandar qajetti jabdyqtarmen jáne otyn qorymen qamtamasyz etilgen.
– Barlyq jylý kózderi búgingi tańda kúzgi-qysqy kezeńdi ótkizýge qajetti jabdyqtarmen jáne otyn qorymen qamtamasyz etilgen. Energııa kózderiniń qoımalarynda otynnyń normatıvtik qory jasaqtalǵan, – dedi Nurlybek Nálibaev.
Sonymen qatar Semeı qalasynda ortalyq jylý pýnktterindegi jóndeý jumystarynyń aıaqtalý merzimi jabdyqtardyń ýaqytyly jetkizilmeýine baılanysty keshiktirilgen.
Qaladaǵy jylý júıelerin iske qosýǵa daıyndyq 5 qazanda qamtamasyz etilgen.
Osyǵan baılanysty Abaı oblysynyń ákimdigine Semeı qalasynyń barlyq turǵyndaryna jylý berýdi jedel aıaqtaý tapsyryldy.
Premer-mınıstr Oljas Bektenov te jylý berý maýsymynyń bastalýyna qatysty birqatar tapsyrma berdi.
– Men jylý kózderi men jylý jelileriniń daıyndyǵyn 1 qazanǵa deıin qamtamasyz etýdi tapsyrǵan bolatynmyn. Bir óńirden basqasynyń bári bul tapsyrmany merziminde oryndady. Tek Semeı qalasynda jylý jelileri ýaqytyly daıyn bolmaı shyqty, – dedi Úkimet basshysy.
Ol Abaı oblysy ákiminiń osy salaǵa jetekshilik etetin orynbasaryn tártiptik jaýapkershilikke tartýdy tapsyrdy.
Úkimet basshysy óńir ákimderine jylý berý maýsymyn ótkizý jónindegi óńirlik shtabtardyń jumysyn qaıta jandandyryp, jylý kózderi men jelileriniń jumysyn turaqty baqylaýda ustaýdy tapsyrdy.
– Josparly parametrlerdiń bári saqtalýy kerek. Sondaı-aq otynnyń normatıvtik qory men qosalqy jabdyqtardyń daıyndyǵyn qamtamasyz etý qajet. Halyqqa qajetti kómir baǵasyn turaqty baqylaýda ustap, otyn tapshylyǵyna jol bermeńizder, – dedi Oljas Bektenov.
Úkimet tapsyrmalarynyń oryndalýyn baqylaý Premer-mınıstrdiń birinshi orynbasary Nurlybek Nálibaevqa júkteldi.
Aıta keteıik,qaı óńirlerde jylytý maýsymy bastalatynyn jazǵanbyz.
