Semeıdegi iri saýda úıindegi órtten taýary búlingen kásipkerler úshin arnaıy shtab quryldy
SEMEI. KAZINFORM – Semeı qalasyndaǵy iri saýda úıindegi órtten taýary búlingen kásipkerlerge kómek kórsetý úshin arnaıy shtab quryldy.
Abaı oblystyq kásipkerler palatasynyń málimetine súıensek, «Aqshyń» saýda ortalyǵynda bolǵan órtten múligi búlingen kásipkerlerdiń tizimi jasalyp, zalal mólsheri eseptelýde. Qazir olarǵa kómek kórsetý boıynsha sharalar qabyldanýda.
Azamattardy qabyldaý, zańgerlik jáne býhgalterlik keńes berý úshin óńirlik palata janynan jedel shtab quryldy. Ol Pýshkın kóshesi, 100 mekenjaıynda ornalasqan.
«Kásipkerlerge zańgerlik jáne konsýltatsııalyq kómek tolyq kórsetiledi. Biz bıznestiń memlekettik organdarmen ózara is-qımyly úshin paıdalanylatyn alań usynamyz. Bul úshin kásipkerlerden naqty ahýaldy bilip, qajetti kómek kólemin esepteý úshin aqparat jınap, bankter, memlekettik organdardan kómek alýǵa usynystar jasaımyz», - dedi oblystyq kásipkerler palatasynyń tóraǵasy Maqsat Súıshinov.
Kásipkerler jetkizgen negizgi ótinishter – nesıe, salyqtar boıynsha tólemderdi keıinge qaldyrý, jańa saýda oryndaryn izdeý.
«Memleketten aldaǵy aptada zardap shekkenderge órtengen zat kóleminiń kemi 10%-yn tóleýdi suraımyz. Alǵashqy alty aıda saýda orny tegin berilse deımiz. Bul bizge baǵa jetpes qoldaý bolmaq», - deıdi kásipkerler.
Eske salsaq, Semeıde 6 jeltoqsanda iri saýda úıi órtengenin habarlaǵan edik.
