Semeıdegi oıyn-saýyq ortalyǵyndaǵy órt: zardap shekkender sany 11 adamǵa jetti
SEMEI. KAZINFORM — Semeı qalasyndaǵy oıyn-saýyq ortalyǵynda bolǵan órtten keıin medıtsınalyq kómekke júgingender sany 11 adamǵa deıin artty. Olardyń ishindegi tórteýi — bala.
Oblystyq densaýlyq saqtaý basqarmasynyń málimetinshe, zardap shekkenderdiń birshamasy aýrýhanaǵa jatqyzylǵan.
Bir bala «Semeı medıtsına ýnıversıteti» KeAQ ýnıversıtettik gospıtaliniń balalar bóliminde em qabyldap jatyr. Taǵy úsh bala dárigerlik tekserýden keıin ambýlatorlyq emge jiberilgen.
Eresekter arasynda medıtsınalyq kómekke jeti adam júgindi. Olardyń tórteýi ýnıversıtettik nefrologııa ortalyǵyna jatqyzyldy. Eki adam tekseristen keıin oqıǵa ornynda qalǵan, al bir adam medıtsınalyq tekserýden bas tartqan.
Eske salsaq, osyǵan deıin Semeıdegi oıyn-saýyq ortalyǵyndaǵy órtti sóndirýge 120 adam men 21 tehnıka jumyldyrylǵany habarlanǵan.
Áýelde alty adam medıtsınalyq kómekke júgingeni jaıly aqparat taratylǵan.
