Semeıdegi oıyn-saýyq ortalyǵyndaǵy órt: alty adam medıtsınalyq kómekke júgindi
SEMEI. KAZINFORM — Semeı qalasyndaǵy Shuǵaev kóshesinde ornalasqan oıyn-saýyq ortalyǵynda bolǵan órtten keıin alty adam medıtsınalyq kómekke júgindi.
Oqıǵa ornyna jedel járdemniń bes brıgadasy jiberildi. Dárigerlerge júgingenderdiń ishinde úsheýi eresek, úsheýi bala.
Eki eresek adam men bir bala medıtsınalyq tekserýden bas tartyp, oqıǵa ornynan óz betinshe ketken. Olar qaladaǵy medıtsınalyq mekemelerge júginbegen.
Bir naýqas kómirqyshqyl gazynan ýlaný dıagnozymen nefrologııa ortalyǵyna jetkizilip, aýrýhanaǵa jatqyzyldy. Oǵan qajetti medıtsınalyq kómek kórsetilip jatyr.
Taǵy eki bala jeke kólikpen oblystyq balalar aýrýhanasyna jetkizilgen. Tekserý nátıjesinde olardyń jaǵdaıy qanaǵattanarlyq dep baǵalanyp, úılerine jiberildi.
— Qazirgi ýaqytta budan basqa medıtsınalyq kómekke júgingender tirkelgen joq. Medıtsınalyq mekemeler shtattyq rejımde jumys istep jatyr, — dep habarlady Abaı oblystyq densaýlyq saqtaý basqarmasynan.
Vedomstvo ókilderi áleýmettik jelilerde taraǵan túrli aqparatqa da túsinikteme berdi.
— Áleýmettik jeliler men messendjerlerde shyndyqqa janaspaıtyn málimetter tarap jatyr. Azamattardy tek resmı aqparat kózderine senýge shaqyramyz. Kórineý jalǵan aqparat taratqany úshin Qazaqstan Respýblıkasynyń zańnamasyna sáıkes qylmystyq jaýapkershilik qarastyrylǵan, — delingen aqparatta.
Eske salsaq, osyǵan deıin Semeıdegi oıyn-saýyq ortalyǵyndaǵy órtti sóndirýge 120 adam men 21 tehnıka jumyldyrylǵany habarlanǵan.
