Semeıdegi oqýshynyń soqqyǵa jyǵylýy: eki ana ata-ana quqyǵynan aıyryldy

Tórtinshi synyp oqýshysyn alty bala uryp, qorlaǵan atyshýly oqıǵa jalǵasyn tapty. Abaı oblystyq sotynyń baspasóz qyzmetiniń habarlaýynsha, bul oqıǵa boıynsha balalardyń agressııa tanytqan ata-analaryna qatysty ata-ana quqyǵynan aıyrý jáne shekteý jónindegi ister sotta qaraldy. 

Ata-ana quqyǵynan aıyrý jáne shekteý týraly talap aryzdar kámeletke tolmaǵandar isi jónindegi oblystyq mamandandyrylǵan aýdanaralyq sotta qaraldy. 

Kámeletke tolmaǵan balany soqqyǵa jyqqan alty ata-ananyń úsheýi komıssııa sheshimine shaǵym túsirgen. Qalǵan ata-analarǵa qatysty sot otyrystary ótkizilip, mynadaı sheshim qabyldandy.

Kámeletke tolmaǵan qyzdyń anasyn ata-ana quqyǵynan aıyrý týraly talap aryz qanaǵattandyryldy.

Taǵy bir kámeletke tolmaǵannyń anasyn ata-ana quqyǵynan aıyrý týraly talap ishinara qanaǵattandyryldy.  Al onyń ákesiniń quqyǵy shekteldi – mundaı sheshim onyń bala tárbıesine uzaq ýaqyt boıy aralaspaýy jáne alkogoldi shamadan tys qoldanýy eskerilip qabyldandy. 

Sondaı-aq, kámeletke tolmaǵandardyń ata-analarynan alıment pen memlekettik baj óndirip alyndy. Qyz balalar qamqorshylyq jáne qorǵanshylyq organdarynyń qaraýynda.

Eske salsaq, Semeıde jasóspirimder altynshy synyp oqýshysyn soqqyǵa jyqqany habarlanǵan.

Sondaı-aq 6-synyp oqýshysy soqqyǵa jyǵylǵan mektep dırektory jumystan shyǵarylyp, oqýshyny soqqyǵa jyqqan 3 jetkinshektiń áke-sheshesi ata-analyq quqyǵynan aıyrylǵany habarlanǵan.