Semeıdegi qurylys jumystarynyń qarqyny tekserildi
SEMEI. KAZINFORM - Abaı oblysynyń ákimi Nurlan Uranhaev Semeı qalasyndaǵy nysandardy kezekti márte aralap, qurylys jumystarynyń barysyn tekserdi.
Aımaq basshysy aldymen jóndeý júrgizilip jatqan TsTP-66-ǵa bardy. Joba sheńberinde uzyndyǵy 1,9 shaqyrym kvartalishilik jylý jelisin qaıta jańǵyrtý jáne ortalyq jylý pýnkti ǵımaratyna jylý-mehanıkalyq qurylǵy ornatý jumystary júrgizilip jatyr.
«Qazirgi tańda jylý jelisiniń 80%-yna demontaj jasalyp, 760 metri tóseldi. Qaıta jańǵyrtý jumysy kestege sáıkes oryndalýda. Semeıde 52 tósek orynǵa eseptelgen oblystyq aýrýhana bazasyndaǵy balalar bólimshesiniń qurylysy júrgizilip jatyr. Qurylys alańy 1 420 sharshy metrdi qurasa, jalpy aýdany – 2 216 sharshy metr», - dep habarlady oblys ákimdiginen.
Atalǵan ǵımarattyń kólemi 10 880 tekshe metrge jetedi. Jańa balalar bólimshesinde qýaty 1,5 tonna magnıtti-rezonanstyq tomograf, rentgendik dıagnostıkalyq apparat jáne ońaltý jabdyǵy ornatylady. Nysannyń qurylysyn «SemKZ» JShS júrgizedi. Bıyl Beıbitshilik aralynda da aýqymdy jumystar bastaldy. Negizgi mindetterdiń biri – balalar temirjolyn qalpyna keltirý. Joba jazdyń sońyna deıin aıaqtalady dep josparlanyp otyr.
«Biz jaıly jáne qaýipsiz orta qurý arqyly, árbir turǵynnyń ómir súrý jaǵdaıyn jaqsartýǵa tyrysamyz. Barlyq joba meniń baqylaýymda. Jumystardyń josparǵa sáıkes oryndalyp jatqanyna kóz jetkizý úshin únemi tekserip otyramyn. Semeıdiń zamanǵa saı damýy mańyzdy», - dedi Nurlan Uranhaev.
Oblys ákimi tıisti bólimder men merdigerlerge jumys qarqynyn jedeldetip, belgilengen merzimde aıaqtaýdy tapsyrdy.
