Semeıdegi kásiporyn 125 jumysshyǵa zańsyz aıyppul salyp tastaǵan – prokýratýra

SEMEI. KAZINFORM – Semeı qalasynda kásiporyndardyń birinde jumys berýshi jumysshylarǵa zańsyz aıyppul salǵan.

Semeı qalalyq prokýratýrasynyń málimetine súıensek, kásiporyndardyń birindegi jumys berýshi jumysshylarǵa eńbek tártibin buzdy degen jeleýmen aıyppul salyp tastaǵan. Bul QR Eńbek kodeksiniń talaptaryna qaıshy.

- Zańǵa sáıkes, eńbek tártibin buzǵan adamdy jaýapkershilikke tartqanda aıyppul salý quqyǵy joq. Demek, basshy mundaı tártiptik jaza qoldana almaıdy. Prokýratýranyń aralasýynan keıin kásiporyndaǵy jumys berýshiniń zańsyz buıryǵynyń kúshi joıyldy. Bul kásiporynnyń 125 qyzmetkeriniń konstıtýtsııalyq quqyǵyn qorǵaýǵa múmkindik berdi, - delingen aqparatta.

Osy rette, prokýratýra barlyq jumys berýshige aıyppul salý jazasyn qoldaný tek ákimshilik quqyq buzýshylyq týraly zańnama aıasynda júrgiziletinin eskertti.

Eske salsaq, buǵan deıin ShQO ákimdigi 160 mln teńgege qyzmettik kólikter ne úshin kerektigin túsindirgeni habarlanǵan.