Semeıdegi Qarakól aýylynda birneshe úıdiń aýlasyn sý basty
SEMEI. KAZINFORM – Semeı qalasy Ozerkı aýyldyq okrýginiń Qarakól aýylynda birneshe úıdiń aýlasyn sý basty.
Kún kúrt jylynyp, qardyń jyldam erýine baılanysty qyzyl sý Qarakól eldi mekenine jaıyldy. Qazirgi ýaqytta jergilikti atqarýshy organnan 10 adam jáne 4 tehnıka sýdy burý boıynsha jumystar júrgizýde.
«Sý tasqynynyń aldyn alý sharalaryn júrgizý úshin Abaı oblysy TJD-dan 13 adam, 4 tehnıka men 4 motopompa aýylǵa jumyldyryldy. Barlyǵy 4 úıdiń aýlasyna sý kirgen. Departament qyzmetkerleri eldi meken aýlalaryn túgel aralap, monıtorıng júrgizýde», - dep habarlady óńirlik TJD baspasóz qyzmeti.
Qosymsha 68303 áskerı bóliminen 20 adam jáne 1 tehnıka kómekke jiberildi. Sonymen qatar erigen qar sýy Semeı-Qaraýyl tasjolynyń ústi arqyly ótken. Osy sátte qyzyl sýdyń jaıylýy toqtatyldy.
«Semeı Joldary» JShS-nyń 4 adamy jáne 2 tehnıkasy táýlik boıy kezekshilikte tur.
