Semeıdegi aspaly kópirde kólik qozǵalysy shekteledi

SEMEI. KAZINFORM — Semeı qalasyndaǵy aspaly kópirde júrgizilgen asfaltbeton jamylǵysyn tóseý jumystaryna baılanysty kólik qozǵalysyna ýaqytsha shekteýler engizilmek.

Abaı oblystyq Polıtsııa departamentiniń málimetine súıensek, ýaqytsha shekteýler erteńnen bastap kúshine enedi. 

— Turlyhanov aınalma joly jaǵynan Bı Boronbaı kóshesine aparatyn kireberis pen kópirden oń jaǵalaýdan sol jaǵalaýǵa qaraı baǵytta Bı Boronbaı kóshesine túsetin jolda kólik qozǵalysy shekteledi. Shekteýler 23 shilde saǵat 16:00–den 24 shilde saǵat 10:00–ge deıin sozylady, — delingen aqparatta.

Tártip saqshylary halyqty ýaqytsha qolaısyzdyqtarǵa túsinistik tanytyp, keptelisterdi boldyrmas úshin marshrýtty aldyn ala josparlap alýdy surady.

Eske salsaq, osyǵan deıin aptap ystyqqa baılanysty úlken tasjoldarda polıtsııa kúsheıtilgen rejımde qyzmet etip jatqany habarlanǵan.