Semeıdegi ákim saılaýy: turǵyndar ýchaskelerge belsendi kelip jatyr
SEMEI. KAZINFORM — Tań atqaly beri Semeıde saılaý joǵary belsendilikpen ótýde — turǵyndar daýys berýge kóptep kelip jatyr, dep habarlaıdy Kazinform tilshisi.
Alǵashqy bolyp kelgen saılaýshylarǵa kishigirim syılyqtar daıyndalǵan. Ýchaskelerde án-kúı shyrqalyp, merekelik kóńil-kúı qalyptasqan.
Óz saılaý ýchaskesin Telegram jelisindegi @vote_abai_bot botynan bilýge bolady. Bul qyzmetti júzdegen semeılik paıdalanyp úlgergen.
— Búgin — Semeı úshin erekshe kún. Biz qalanyń bolashaǵyn senip tapsyratyn basshyny saılap jatyrmyz. Tańerteńnen bastap halyqtyń belsendiligi qýantady, — dedi Halyqaralyq «Qazaq tili» qoǵamynyń vıtse-prezıdenti Oral Sháripbaev.
Ol № 84 saılaý ýchaskesine alǵashqylardyń biri bolyp kelip, daýys berdi.
Saılaýǵa alǵash ret qatysyp otyrǵan jas saılaýshy Bekjan Qorabaev jýyrda ǵana 18 jasqa tolǵan. Ol bul saılaýdy mańyzdy azamattyq qadam dep esepteıtinin aıtty.
Aýmaqtyq saılaý komıssııasynyń málimetinshe, Semeıdegi daýys berý úderisi tynysh ótip jatyr, eshqandaı zańbuzýshylyq tirkelmegen.
Eske salaıyq, Semeı qalasy ákiminiń saılaýyna daýys berý bastaldy.