Semeıdegi 11 adam zardap shekken órtten keıin barlyq oıyn-saýyq ortalyqtary tekseriledi
SEMEI. KAZINFORM – Semeı qalasyndaǵy «BALA park» ortalyǵynda bolǵan órtke baılanysty óńirdegi barlyq balalar oıyn-saýyq alańdaryna tekserý júrgizilmek.
Oblys ákimdiginiń málimetine súıensek, óńirdegi barlyq oıyn-saýyq ortalyqtary, saýda úıleri jáne adamdar kóp jınalatyn nysandardyń órt qaýipsizdigi talaptaryna sáıkestigi tekseriledi.
- Aımaq basshysy Berik Ýálı jaýapty memlekettik organdarǵa atalǵan nysandarda órt qaýipsizdigi erejeleriniń qatań saqtalýyn, evakýatsııalyq oryndardyń jaı-kúıin, órt sóndirý quraldarynyń daıyndyq deńgeıin zerdelep, qaýipsizdik júıeleriniń jumysyna baqylaýdy kúsheıtýdi júktedi, - delingen aqparatta.
Aıta keteıik, keshe saǵat 19:00 shamasynda Semeı qalasyndaǵy «BALA park» balalar oıyn-saýyq ortalyǵynan órt shyqqan bolatyn. Tótenshe jaǵdaılar departamentiniń kúshteri men quraldary oqıǵa ornyna jedel túrde jiberildi.
Jedel shtab qurylyp, 120 qutqarýshy, 75 polıtsııa, 15 jedel medıtsınalyq járdem qyzmetkerleri, 30-dan astam tehnıka jumys istedi. Saǵat 20:30-da órt oqshaýlanyp, kóp keshikpeı tolyq sóndirildi. Órttiń jalpy aýmaǵy 3100 sharshy metrdi qurady.
Adam shyǵyny bolǵan joq. Jalpy sany 11 adam medıtsınalyq kómekke júgindi, qazirgi ýaqytta 5 adam aýrýhanada em alyp jatyr.
