Semeıde jylytý maýsymyna qyzý daıyndyq júrgizilýde
SEMEI. QazAqparat – Semeı qalasynda bıylǵy jylytý maýsymyna qyzý daıyndyq júrgizilýde, dep habarlaıdy QazAqparat tilshisi.
Semeıde osy jyly jylytý maýsymyna daıyndyq jumystaryna jáne qaladaǵy qazandyqtardy rekonstrýktsııalaýǵa 2 mlrd teńgeden astam qarajat bólingen. Ortalyq, Ǵabbasov, 103, 103A, 35 kvartal atty qazandyqtarda jóndeý jumystary aıaqtalýǵa jaqyn. Bul týraly onlaın-brıfıng barysynda «Teplokommýnenergo» MQK basshysynyń orynbasary Nıkolaı Demın málimdedi.
«Merdiger kompanııa jumystarda bekitilgen kestege sáıkes júrgizýde. Osy jylǵy jylytý maýsymynda eshqandaı olqylyq bolmaıdy degen senimdemiz. Jaýapty mamandar barlyǵyn muqııat tekserip jatyr», - dedi ol.
Nıkolaı Demınniń aıtýynsha, jylý aýa temperatýrasyna baılanysty beriledi. Eger úsh kún boıy turaqty túrde 8 gradýs sýyq bolsa, onda úıge jylý qosylady.
«Sol jaǵalaý aýdanynyń turǵyndary ystyq sýmen osy demalys kúnderi qamtamasyz etiledi. Al oń jaǵalaý halqyna jóndeý jumystary aıaqtalǵanǵa deıin tosa turýlaryna týra keledi», - dedi kásiporyn basshysynyń orynbasary.
Esterińizge sala ketsek, byltyr Semeıde jylý júıesinde apat bolyp, 580 páter jylýsyz qalǵan bolatyn.
