Semeıde jylytý maýsymy merziminen buryn bastaldy
Qalalyq aqparat ortalyǵynyń málimetinshe, aýa temperatýrasynyń tómendeýine baılanysty jáne JRVI-diń órshýine jol bermes úshin 25 qyrkúıekte jylytý maýsymy bastalǵan.
Aldyńǵy jyldary jylý kezeń-kezeńimen qosylǵan edi: áýeli áleýmettik jáne densaýlyq saqtaý nysandary, sodan keıin turǵyn úıler. Al osy jyly barlyǵyna birdeı ýaqytta qosyldy.
«Qazir kúnniń sýytýyna oraı qalalyq turǵyn úı-kommýnaldyq sharýashylyq bóliminiń buıryǵymen «Teplokommýnenergo» jylytý maýsymyn bastady. Búgin áleýmettik nysandar men turǵyndarǵa jylý beriledi», - deıdi JETs-1 óndiris jónindegi dırektorynyń orynbasary Nıkolaı Demın.
Onyń aıtýynsha, kásiporyndaǵy kómir qory shamamen 50 myń tonnany quraıdy. Bul jylý berý kezeńinde qazandyqtardyń jumysyn tolyqtaı qamtamasyz etedi.
«Bıyl JETs-1 men 103 qazandyqqa jóndeý jumystary júrgizildi. Osy maqsatta bıýdjetten 127 mıllıon teńge bólingen. Bizde kómir jetkilikti. Qatty otyn kúndelikti 20-22 vagon mólsherinde jetkiziledi. Qys mezgiline 100 paıyz daıynbyz», - dedi N.Demın.
Aıta keteıik, qazirgi ýaqytta qala boıynsha kómirdiń bir tonnasynyń baǵasy - 9500 teńge.
