Semeıde jylytý maýsymy bastalǵaly jelide 147 ret aqaý shyqqan
SEMEI. QazAqparat – Jylytý maýsymy bastalǵaly beri Semeıdegi jylý jelilerinde 147, jylý kózderinde 31 aqaý shyqqan. Bul týraly baspasóz máslıhaty barysynda «Teplokommýnenergo» MKK dırektory Serik Túlenbergenov málim etti, dep habarlaıdy QazAqparat tilshisi.
«Búgingi tańda barlyq jylý kózderi temperatýralyq rejımge sáıkes jumys istep tur. Abonentter jylýmen úzdiksiz qamtylǵan. Tótenshe jaǵdaılardy jedel joıý úshin materıaldyq-tehnıkalyq resýrstardyń qory jetkilikti», - dedi ol.
Serik Túlenbergenovtiń aıtýynsha, úıler men nysandardyń jylýmen qamtamasyz etilýine kúndelikti baqylaý júrgizilýde.
«Tekserý nátıjeleri boıynsha birneshe turǵyn úıdiń jylytý maýsymyna daıyndyq pasporttarynyń joqtyǵy anyqtaldy. Tipti kóptegen úılerde basqarý organy da joq (MIB, PIK). Búginde qala boıynsha jylý jelileriniń tozýy orta eseppen 68% quraıdy», - dedi kompanııa dırektory.
Sondaı-aq búgin 103-shi qazandyqtyń qubyrynda jarylys bolǵan. Ol Zasıadko kóshesinde ornalasqan. Atalmysh qubyrǵa 150 abonent qosylǵan. Aqaý qysqa merzimde joıyldy.
