Semeıde jylýǵa qaryz turǵyndar jaryqtan ajyratylýda

SEMEI. QazAqparat - Semeıde «Jylýkommýnenergo» mekemesi qaryzy bar turǵyndarmen kúresti bastady. Jyldap tutynǵan jylý úshin aqsha tólemegenderdiń páterleri jaryqtan ajyratylýda, dep habarlaıdy QazAqparat tilshisi.  

Qala boıynsha turǵyndardyń jylý mekemesi aldyndaǵy qaryz mólsheri 600 mln teńge. Onyń 70 paıyzy turǵyndarǵa tıesili. Sondyqtan «Jylýkommýnenergo» mekemesiniń qyzmetkerleri jyldap jınalǵan qaryzdy qaıtarýǵa qulyqsyz turǵyndarmen kúresti kúsheıtýde. Jyl basynan beri 200 abonentke bereshekti qaıtarý týraly eskertý jasalǵan. Endi eskertýdi elemegen 80 boryshker jaryqtan ajyratylýda.

«Boryshkerlermen kúres jumystary jyl boıy jalǵasady. Biz qatań sharaǵa kóshýge májbúrmiz. Sebebi, turǵyndar tutynǵan jylýǵa aqsha tóleýge asyqpaıdy. Endi jylýǵa aqshany 3 aıdan artyq tólemese  turǵyndar ret-retimen jaryqtan ajyratylady»,-dedi «Jylýkommýnenergo» mekemesiniń bólim basshysy Gaýhar Jetpisbaeva.

Jylý mekemesiniń qyzmetkerleri 3 myńnan artyq turǵynnyń ústinen sotqa  shaǵym túsirgen. Búginde olardyń 1500-i sot oryndaýshylarynyń qaraýynda. Sot qaýlysy shyqqannan keıin boryshkerlerdiń múlki tárkilenip, eńbek jáne zeınetaqysynan jylý  bereshegi óndiriledi. Sonymen qatar qaryzyn qaıtarmaıtyn zańdy tulǵalarǵa da jylý berý toqtatylady. Búginde olardyń jalpy qaryzy 32 mln teńge. Qazir tehnıkalyq qujattardy qaıtaryp alý týraly hat daıyndalyp jatyr.   

 «Búgingi kúni ortalyq jylý júıesine qosylǵysy keletin  abonentter kóp. Alaıda, jylýdyń jetkiliksiz mólsherinen ótinishter keri qaıtarylady. Endi qaryzdy tólemeıtin nysandardy jylýdan ajyratyp, ótinish bergen nysandarǵa qosatyn bolamyz»,-dedi Gaýhar Jetpisbaeva.