Semeıde jylqy basy 15,6 paıyzǵa artty

SEMEI. QazAqparat – Semeıde osy jyly jylqy sany 15,6 paıyzǵa artty. Bul jaıly Aqparat ortalyǵynda ótken baspasóz máslıhaty barysynda shahar ákimi Baqytjan Baıahmetov aıtty, dep habarlaıdy QazAqparat tilshisi.

«Jalpy bıyl 15 600 gektar alańǵa aýylsharýashylyq daqyldary egildi. Mıneraldy tyńaıtqyshtardy óndirý, paıdalaný jáne jańa tehnologııalardy qoldaný barlyq daqyldarynyń ónimdiligin arttyrýǵa múmkindik berdi. Naqty aıtqanda, bıdaı – 30%, maıly daqyldar – 16%, kartop – 20%, kókónis – 9% jáne baqsha daqyldary – 4,5% artty», - dedi ol.

Et ónimderi – 6,2%, sút – 2,9% jáne jumyrtqa 2,8 esege ósken. Sondaı-aq iri qara mal basy – 8,5%, qoı jáne eshki – 7,4%, jylqy 15,6% artyp otyr.

«Sonymen qatar osy jyly aýyl sharýashylyǵy salasynda ter tógip júrgen kásip ıelerine 40 jeńildetilgen nesıe berilgen. Osylaısha sharýagerler 748 iri qara, 1370 bas usaq mal jáne 513 jylqy satyp aldy», - dedi Baqytjan Baıahmetov.

Esterińizge sala ketsek, osyǵan deıin qala ákimi jylýmen qamtýdaǵy qordalanǵan máselelerdiń qalaı sheshilip jatqanyn málim etken bolatyn.