Semeıde jyl sońyna deıin maı zaýyty iske qosylady

SEMEI. QazAqparat – ShQO ákimi Danıal Ahmetov Semeı qalasyna jumys saparymen baryp, maıly daqyl óńdeıtin zaýyttyń qurylys jumystarymen tanysty, dep habarlaıdy QazAqparat tilshisi.

Jańa zaýyt kún saıyn 1000 tonnadan astam kúnbaǵys maıyn shyǵaratyn bolady. Zaýyttyń qurylysy osydan jarty jyl buryn bastalǵan.

«Bizdiń kásiporyn aýyl sharýashylyǵy ónimderin óndirýshiler úshin mýltıplıkatıvti ekonomıkalyq nátıje beredi. Zaýyt oblys ishinde maı ónimderin satatyn sharýalardyń máselesin tolyǵymen sheshpek. Búginde ekstraktsııa tsehynyń metall qurylymdary aıaqtaldy, olar Semeı mehanıkalyq zaýytynda jasalǵan. Qurylystyń negizgi jumystary máresine jetken. Qazir qurylymdar men jabdyqtardy montajdaý jumystary júrip jatyr», - dedi «QAZAQ-ASTYQ GROUP» JShS dırektory Erkinbek Dosqojanov.

Danıal Ahmetov óńdeý ónerkásibi kásiporyndaryn ashý memleketimizdiń damýyna yqpal etetinin atap ótti.

«Osydan jarty jyl buryn bul zaýytqa kelgen kezde eshteńe bolǵan joq edi. Dese de qysqa ýaqyt ishinde ońdy ózgeristerdi kórip otyrmyz. Mundaı kásiporyndar memleketimizdiń damýy úshin óte mańyzdy. Bul jerde atqarylyp jatqan jumystar Prezıdentimiz Qasym-Jomart Toqaevtyń tapsyrmasyn júzege asyrý maqsatynda qolǵa alynǵan. Óndirilgen ónim Qazaqstan naryǵynda ǵana emes, Qytaı Halyq Respýblıkasy, Reseı Federatsııasy elderinde de satylady. Sáıkesinshe, zyǵyr, raps jáne kúnbaǵys egis alqaby keńeıtiledi», – dedi ShQO ákimi.

Zaýyt osy jyldyń jeltoqsan aıynda paıdalanýǵa berilmek. Jospar boıynsha munda 250 jańa jumys orny ashylady.