Semeıde jyl basynan beri 64 jol apaty tirkeldi
SEMEI. QazAqparat – Semeı qalasynda jyl basynan beri 64 jol apaty tirkelip, 5 adam kóz jumdy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, jyl basynan beri shahar boıynsha 64 jol apaty tirkelgen. Sonyń saldarynan 5 adam kóz jumyp, 90 azamat túrli deńgeıdegi jaraqat aldy.
«Jol-kólik oqıǵalarynyń negizgi sebepteri – júrgizýshilerdiń jyldamdyqty ruqsat etilgen shekten asyrýy, kólikti mas kúıde tizgindeý, basyp ozý erejelerin buzý, qarsy jolaqqa shyǵý. Turǵyndardyń aqaýy bar kólikti júrgizýi de jol apattaryna ákelip soǵyp jatady. Sondaı-aq jaıaý júrginshilerdiń erejelerdi saqtamaýy saldarynan bolatyn oqys oqıǵalar jıilep ketti», - delingen aqparatta.
Osy rette, tártip saqshylary jurtshylyqqa jol júrý erejelerin qatań saqtap, jolda árdaıym abaı bolý qajettigin eskertedi.
Esterińizge sala ketsek, osyǵan deıin Semeı qalasynda saýda úıine bomba qoıylǵandyǵy týraly jalǵan habar túskenin habarlaǵan edik.
