Semeıde jyl basynan beri 24 bala menıngıt juqtyrǵan
SEMEI. QazAqparat - Semeıde 7 aı ishinde 25 adam menıngıt aýrýyn juqtyrǵan. Onyń ishinde tek bir ǵana naýqas - eresek. Bul aýrý balalar arasynda tez taralatyn bolyp tur, dep habarlaıdy QazAqparat Semeı aqparat ortalyǵyna silteme jasap.
Bul jóninde Semeı qalasy juqpaly aýrýlar aýrýhanasynyń dırektory Sáýle Raýshanqyzynyń jáne mamandardyń qatysýymen ótken baspasóz máslıhatynda aıtyldy.
Serozdy menıngıt - mıdyń serozdy qabyqtaryn zaqymdaıtyn enterovırýstyq aýrý. Barlyq vırýstar belgili bir maýsymda órshıdi. Tumaý jáne gerpesvırýstar kúzgi-qysqy kezeńderde kóp taralsa, al enterovırýstar úshin ishek vırýsy sııaqty jazǵy kezeń tán.
Enterovırýstyq ınfektsııa kóp jaǵdaıda sý men tamaq arqyly juǵady. Negizgi klınıkalyq belgileri: dene qyzýynyń kóterilýi, bas aýrýy, júrektiń aınýy, loqsý. Atalǵan belgiler paıda bolǵan jaǵdaıda óz betinshe emdelýge jol bermeı, birden dárigerge kóriný kerek deıdi mamandar.
- Vırýs tabylǵan jaǵdaıda adamǵa tolyq dıagnostıka jasap, emdeý qajet. Bul juqpaly aýrý tamyz aıynda qatty órshıdi. Osyǵan baılanysty negizgi maqsat – bul ınfektsııanyń halyq arasynda, atap aıtqanda balalar arasynda ósýine jáne odan ári taralýyna jol bermeý kerek. Jáne bul mamandar baqylaýynda, - dedi epıdemıologııalyq qadaǵalaý bóliminiń bas mamany Dınara Beksultanqyzy.
Juqpaly aýrýdy juqtyrmaý úshin qarapaıym gıgıena erejelerin saqtaý kerek. Jemister men kókónisterdi muqııat jýý, qoldy jýý, úı-jaıdy jeldetý. Sý aıdyndarynda jáne basseınderde shomylǵanda aýyz qýysyna sý jibermeý qajet.
