Semeıde júrgizýshi tapshylyǵy saldarynan avtobýstar sırek qatynaıdy
Semeı qalasynyń halqy avtobýstardyń tym sırek júretinin aıtyp shaǵymdanyp jatyr. Al buǵan júrgizýshi tapshylyǵy sebep bolǵan, dep habarlaıdy Kazinform.
Búginde Semeıdegi eń ózekti máselelerdiń biri – qoǵamdyq kólikterdiń jelide tym az júrýi. Oǵan basty sebep – «D» kategorııasy bar júrgizýshilerdiń jetispeýshiligi.
Osynyń saldarynan aıazdy kúnderi halyq talaı ýaqytyn aıaldamada avtobýs kútýmen ótkizýge májbúr. Qala ákimdigi jolaýshy tasymalyna qatysty bos jumys oryndarynyń kóptigin aıtyp, halyqty jumysqa shaqyrdy.
«Máselen, «Taksomotorlyq park» JShS shuǵyl túrde D sanatyndaǵy júrgizýshilerdi, qoımashylardy, elektrıkterdi, mehanıkterdi jumysqa alýǵa daıyn. Barlyq áleýmettik aýdarym júredi. Qala syrtyndaǵy júrgizýshilerge baspana da beriledi. «Avto Trans Semeı» JShS-ǵa «D» jáne «D1» sanatyndaǵy júrgizýshiler qajet. Nıet bildirýshilerge kestege sáıkes demalys kúnderi beriledi. Júrgizýshilerdi yntalandyrý maqsatynda ústemeaqy da tólenbek. Sondaı-aq «Semavtopark» JShS-ǵa da «D» sanatyndaǵy júrgizýshiler qajet», - dep habarlady ákimdikten.
Aıta keteıik, 11 jeltoqsanda Semeıde aýa raıy -25 gradýsqa tómendedi. Sondyqtan mektepterdegi 1 jáne 2 aýysymdaǵy 1-4 synyp oqýshylary onlaın formatqa kóshirilgen.
