Semeıde júrgizýshi kýáligine qatysty alaıaqtyq faktisi anyqtaldy
SEMEI. KAZINFORM — Semeı qalasynyń 21 jastaǵy turǵyny polıtsııaǵa júginip, 2025 jyldyń jeltoqsan aıynda alaıaqtyqtyń qurbany bolǵanyn habarlaǵan. Bul týraly Polisia.kz jazdy.
Byltyr jeltoqsan aıynda Semeı qalasynyń 21 jastaǵy turǵyny alaıaqqa aldanyp, san soǵyp qalǵan. Ol aldanǵanyn alǵa tartyp, polıtsııaǵa júgingen. Onyń aıtýynsha, burynnan jaqyn tanys emes er adam júrgizýshi kýáligin alyp berýge kómektesemin degen jeleýmen 785 myń teńge kólemindegi aqshasyn ıemdengen.
— Aqshany alǵannan keıin ýáde etilgen qyzmet kórsetilmegen. Jedel-izdestirý sharasy barysynda qylmysqa kúdikti retinde Borodýlıha aýdanynyń 23 jastaǵy turǵyny anyqtalyp, polıtsııa basqarmasyna jetkizildi, — dep habarlady QR ІІM baspasóz qyzmeti.
Atalǵan fakti boıynsha «Alaıaqtyq» baby boıynsha sotqa deıingi tergeý júrgizilip jatyr. Kúdiktige kelý mindettemesi túrindegi bultartpaý sharasy qoldanylyp, is materıaldary tergeý organyna joldandy.
Polıtsııa kez kelgen qujatty zańdy rásimderdi aınalyp ótip, «jedeldetip» alýǵa qatysty usynystardyń zańsyz ekenin jáne mundaı áreketter qarjylyq shyǵynǵa ákelýi múmkin ekenin eskertedi.
Buǵan deıin Shymkent qalasynda bir azamat júrgizýshi kýálikterin zańsyz satý arqyly baıyp ketkeni týraly habarlanǵan bolatyn.
Eske sala keteıik, buǵang deıin Ulttyq qaýipsizdik komıteti úsh óńirde júrgizýshi kýáligin rásimdeýdegi jemqorlyq shemasyn áshkerelegen bolatyn. Jyldyń basynan beri Astana qalasynda, Aqmola jáne Pavlodar oblystarynda avtomektepterdiń qyzmetin uıymdastyrý jáne júrgizýshi kýálikterin resimdeý kezinde zańsyz syıaqy alý jáne ókilettikterdi teris paıdalaný faktileri anyqtalǵan edi.
