Semeıde júrgizýshi kýáligine emtıhan tapsyratyn avtodrom eki aptaǵa jabyldy
SEMEI. QazAqparat – Semeı qalasynda mamandandyrylǵan HQO-daǵy avtodrom eki aptaǵa jabyldy, dep habarlaıdy QazAqparat tilshisi.
«Azamattarǵa arnalǵan úkimet» memlekettik korporatsııasy ShQO boıynsha fılıaly baspasóz qyzmetiniń málimetinshe, Semeıdegi mamandandyrylǵan HQO-nyń avtodromynda 23 aqpannan bastap jóndeý jumystary júrgizilip jatyr.
Ol eki aptaǵa sozylady dep kútilýde.
«Qazir avtodromda magnıttik datchıkter negizinde eskirgen júıe jumys isteıdi. Olar apattyq jaǵdaılar kezinde jıi isten shyǵady. Sondaı-aq qolaısyz aýa raıy kezinde túrli aqaýlarǵa tap bolamyz. Jóndeý barysynda magnıttik datchıkter jańa GPS-júıesine aýystyrylmaq. Osylaısha, praktıkalyq emtıhan spýtnıktik sıgnal arqyly ótetin bolady», - deıdi fılıal dırektorynyń orynbasary Rýslan Kıbke.
Endi munda júrgizýshi kýáligine emtıhan ýaqytsha tapsyrylmaıdy.
Shuǵyl túrde júrgizýshi kýáligin alý qajet bolsa, klıentter teorııa emtıhanyn Semeıde, al kólik júrgizý emtıhanyn Óskemende tapsyra alady.
