Semeıde jumysyna salǵyrt qaraǵan polıtseıler sottaldy

SEMEI. QazAqparat - Semeıde ákimshilik jolmen qamaýǵa alynǵan tulǵalardy ustaıtyn arnaıy qabyldaý ornynda áıel óz-ózine qol jumsaǵan. Sol kúni jumysyna salǵyrt qaraǵan kezekshi polıtsııa qyzmetkerlerine qatysty sot úkimi shyqty. Bul týraly QazAqparat Semeı qalalyq №2 sotynyń baspasóz qyzmetine silteme jasap habarlaıdy.

Qaıǵyly oqıǵa 2017 jyldyń 11 qazanynda bolǵan. Áıel kıiminiń baýynan arqan jasap, esiktiń tutqasyna asylyp qalǵan. Al kezekshi polıtsııa qyzmetkeri onyń denesin 2 saǵat ótkennen keıin kórgen. Birneshe kún buryn ǵana qamaýǵa alynǵan áıeldi baqylaýǵa alýdy kórshi kameradaǵy áıelder polıtsııa qyzmetkerine eskertken. Alaıda olar eskertýdi elemegen. Oqıǵadan keıin jumysyna salǵyrttyq tanytyp, óz mindetin durys oryndamaǵany úshin eki polıtsııa qyzmetkeri QR Qylmystyq kodeksiniń 371-baby 2-tarmaǵy (Salǵyrttyq) boıynsha jaýap tartyldy.

Sottyń baspasóz qyzmetiniń málimetinshe oqıǵa bolatyn kúni kezekshi polıtseıler jańadan kelgen ákimshilik qamaýǵa alynǵan adamdardyń sýretterin túsirip, saýsaq izderin alǵan. Sondyqtan beınebaqylaý kamerasyna da qaramaǵan.

№2 soty kezekshilik atqarǵan polıtsııa qyzmetkerlerin kináli dep tapty. Birinshisine 1 jyl 6 aı, ekinshi kezekshilik atqarǵan polıtsııa qyzmetkerin 2 jyl merzimge bas bostandyǵynan aıyrý jazasyn taǵaıyndady. Sonymen qatar, aıyptalýshylar memlekettik qyzmette úsh jyl jumys isteý quqyǵynan aıyryldy.