Semeıde jumyssyzdar kásiptik mamandyqtardy ıgerýde
SEMEI. QazAqparat - Semeıde ekinshi jyl qatarynan «Eńbek» nátıjeli jumyspen qamtý jáne jappaı kásipkerlikti damytý baǵdarlamasy sheńberinde jumyssyzdar kásiptik mamandyqtarǵa oqytylýda, dep habarlaıdy QazAqparat.
Eki baǵdarlama boıynsha bıyl barlyǵy 765 adam mamandyqtarǵa oqytylýy qajet. Aǵymdaǵy jyl basynan beri qysqa merzimdi kásiptik oqytýǵa naryqtaǵy suranysqa ıe mamandyqtar boıynsha 561 adam joldanǵan. Olar dánekerleýshi, elektr montajdaýshysy, slesar-santehnık, sánger-shashtaraz, kondıter, traktor júrgizýshisi mamandyǵynda bilim alyp jatyr.
Al 2017 jyly tehnıkalyq jáne kásiptik bilimimen kadrlardy daıarlaýǵa joldanǵan 383 adam oqýlaryn naryqtaǵy suranysqa ıe 17 mamandyq boıynsha jalǵastyrýda. Atap aıtqanda avtokran júrgizýshisi, keń profıldi stanokshy, tiginshi, býldozer júrgizýshisi, elektr jáne gazben dánekerleýshi.
«Kásiptik mamandyqtarǵa oqytý, sondaı-aq qalalyq bıýdjetten qarjylandyrylatyn aımaqty órkendetý baǵdarlamasy arqyly da júrgizilýde. Baǵdarlamanyń birinshi baǵyty sheńberinde ıaǵnı, tehnıkalyq jáne kásiptik bilimin jáne qysqa merzimdi kásiptik oqytý 26 mamandyq boıynsha júrgizilýde. Jyldyq jospar 765 adamdy qamtý. Al ekinshi baǵyt aıasynda shaǵyn nesıe alýǵa 92 joldama berildi», - dedi Semeı qalasy ákimdiginiń jumyspen qamtý ortalyǵynyń kásiptik oqytý bóliminiń basshysy Aınur Býrahanova.
«Bastaý-Keńesshi» baǵdarlamasy aıasynda «Atameken» Ulttyq kásipkerlik palatasy arqyly kásipkerliktiń negizderin oqytýdan 68 adam ótken. Olar búginde «Aýyl sharýashylyǵyn qarjylaı qoldaý qory» AQ arqyly 10 qatysýshy 31,5 mln. teńge somasynda jáne 3 qatysýshy «Agrokredıttik korporatsııa» AQ arqyly 22,0 mln.teńge somasynda shaǵyn nesıe alyp, óz isin bastaǵan.
Kórneki sýret
