Semeıde jumysqa alamyz dep nesıe rásimdeıtin alaıaqtar bar
ÓSKEMEN. QazAqparat - Semeı polıtsııasy bir jarym jyldan beri qala turǵyndarynyń qujatyna nesıe rásimdep kelgen onlaın-alaıaqtardy ustady, dep habarlaıdy «QazAqparat» HAA tilshisi.
Qazirge deıin Semeı qalasynyń polıtsııasy is boıynsha 60 alaıaqtyq oqıǵany anyqtady, biraq osyǵan uqsas quqyq buzýshylyqtar boıynsha aryz-shaǵymdar tolastar emes. Alaıaqtar tıgizgen zııannyń jalpy somasy shamamen 1,5 mıllıon teńgeni quraıdy.
«Qalanyń 31 jáne 34 jastaǵy eki turǵynyna qatysty QR Qylmystyq kodeksiniń 190-baby, 2-bóligimen (adamdar tobynyń aldyn ala sóz baılasýymen jasalǵan alaıaqtyq) qylmystyq is qozǵaldy», - dedi oblystyq ishki ister departamentiniń baspasóz qyzmeti.
Tergeý barysynda jábirlenýshiler dál bir kompanııaǵa júgingeni anyqtaldy. Kelgenderge jumysqa qabyldaýǵa ýáde berip, tulǵasyn kýálandyratyn qujattaryn alǵan. Jumysqa zárý turǵyndar olarǵa senip qalǵan. Alaıaqtar árbir adamnyń qujatyna ortasha 10 000 teńge kóleminde onlaın nesıeler rásimdegen. Aqsha aýdarymdaryn júzege asyrý úshin olar eseptik jazba jasap, ekinshi deńgeıli bankter arqyly bank kartalaryn ashqan.
«Biz turǵyndarǵa tólqujat málimetterin ınternet-resýrstarda qaldyrýǵa, elektrondy poshta arqyly jiberýge, bógde kisilerge jeke qujattaryn senip tapsyrýǵa bolmaıtyndyǵyn eskertemiz», - deıdi quqyq qorǵaý qyzmetkerleri.
