Semeıde júk kóligi jasóspirimdi qaǵyp óltirdi
SEMEI. QazAqparat – Semeı qalasynda júk kóligi jasóspirimdi qaǵyp óltirdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, jol-kólik oqıǵasy 13 aqpanda saǵat 16:40 shamasynda bolǵan. Júk tıelgen KamAZ-dy tirkemesimen súırep bara jatqan Shasman júk kóliginiń júrgizýshisi Glýnkı kóshesinen aınalma jolǵa shyǵa bergende «Kóktem» saýda úıiniń janyndaǵy jaıaý júrginshiler jolaǵynan ótip bara jatqan adamdy qaǵyp ketti. 16 jastaǵy Semeı qalasynyń turǵyny sol jerde kóz jumǵan.
«Qazirgi ýaqytta oqıǵa ornynda polıtsııa qyzmetkerleri jumys istep jatyr. Birqatar saraptamalar taǵaıyndaldy. Sonyń nátıjeleri boıynsha protsessýaldyq sheshim qabyldanady», - dedi ShQO PD bastyǵy Saǵat Mádıev.
