Semeıde JOO ǵımaratyndaǵy órt sóndirildi
SEMEI. QazAqparat - Semeı qalasynyń órt sóndirýshileri joǵary oqý ornyndaǵy órt kezinde kitaphana ǵımaraty men muraǵatty alyp qaldy, dep habarlaıdy QazAqparat.
Órtti sóndirýge qalanyń 50-den astam órt sóndirýshisi men 14 tehnıka jumyldyryldy. Jalyn 1987 jyly salynǵan, úsh qabatty joǵary oqý orny ǵımaratynyń bir bólmesin, dáris zalyn sharpydy.
Órt sóndirýshiler 8 saǵat 30 mınýtta 150 sharshy metr alańdaǵy órtti tolyǵymen sóndirdi.
Oqıǵanyń shyǵý sebebin ShQO TJD Órt sóndirý zertteý synaq zerthanasynyń mamandary anyqtaıdy. Qaza bolǵandar men zardap shekkender joq. Órt kezinde ǵımaratta eshkim bolǵan joq.
«ShQO TJD órt qaýipsizdigi erejelerin qatań saqtaý qajettigin eskertedi. Órttiń tutanýyna sebep bolýy múmkin kemshilikterdi joıý kerek. Ǵımarattarda jaramdy avtomatty órt dabyly, alǵashqy órt sóndirý quraldary bolýy tıis. Órt kezinde 101 nemese 112 nómiri boıynsha habarlaý qajet»,-delingen ShQO TJD baspasóz qyzmetiniń habarlamasynda.
Osyǵan deıin Semeıdegi JOO-lardyń biriniń ǵımaraty órtenip jatqanyn habarlaǵan edik.
