Semeıde joldan ótpek bolǵan áıeldi poıyz basyp ketti

SEMEI. KAZINFORM – Semeı qalasynda Dýlatov kóshesindegi temirjol ótkelinde poıyz basyp ketken áıel mert boldy.

Oqıǵa 14 sáýirde «Jansaıa» bazarynyń mańyndaǵy temirjol ótkelinde boldy. Áıel júk poıyzy toqtap turǵan kezde temirjoldy kesip ótpek bolǵan. Alaıda ol vagondardyń arasynda bolǵan sátte poıyz qozǵala bastaǵan.

Osylaısha, poıyz basyp ketken áıel sol jerde kóz jumdy. Oqıǵanyń vıdeosy áleýmettik jelide taraǵan.

Semeı stansasynyń jelilik polıtsııa bóliminiń habarlaýynsha, atalǵan faktige qatysty Qylmystyq kodeksiniń 344-baby (Jol qozǵalysy nemese temirjol kóligin paıdalaný qaýipsizdigi qaǵıdalaryn buzý) boıynsha sotqa deıingi tergeý amaldary bastaldy.

Eske salsaq, osyǵan deıin Pavlodarda er adam poıyz astyna túsip mert bolǵany jaıly habarlaǵan edik.