Semeıde jolaýshylar avtobýsy júrip kele jatyp órtke orandy
ASTANA. KAZINFORM – Semeı qalasynda qozǵalys kezinde jolaýshylar avtobýsynan órt shyqty.
Oqıǵa Qarjaýbaıuly kóshesinde bolǵan. Órt týraly habar túsken boıda oqıǵa ornyna TJM bólimsheleri jedel jetti.
Qutqarýshylar órtti qysqa ýaqyt ishinde tolyq sóndirdi.
Vedomstvo málimetinshe, oqıǵadan eshkim zardap shekken joq. Órt shyqqan sátte avtobýsta jolaýshylar bolmaǵan.
– Kólik quraldarynyń tehnıkalyq jaǵdaıyn jáne elektr jabdyqtarynyń jaramdylyǵyn únemi tekserip otyrý qajet, – dep eskertti Tótenshe jaǵdaılar mınıstrligi.
Órttiń shyǵý sebebi ázirge habarlanǵan joq.
Aıta keteıik, buǵan deıin Batys Qazaqstan oblysynda 37 jolaýshysy bar avtobýs órtengen bolatyn. Oqıǵa kezinde jolaýshylar qaýipsiz jerge shyǵyp úlgergen, zardap shekkender tirkelmegen.