Semeıde jol ústinde kóligin toqtatyp, bı bılegen 4 júrgizýshi jaýapqa tartyldy
SEMEI. KAZINFORM – Semeı qalasynda 4 kólik júrgizýshisi jol ústinde bı bılegeni úshin ákimshilik jaýapkershilikke tartyldy.
Semeıde «Hyundai Sonata», «Chevrolet Cobalt», «Hyundai Elantra» jáne «Lada 2172» avtokólikteriniń 19 jastaǵy tórt júrgizýshisi jol boıynda bı bılep, chellendj ótkizgen. Bul áreket úlken qoǵamdyq narazylyq týdyryp, polıtsııanyń nazaryn aýdardy.
Abaı oblystyq Polıtsııa departamenti baspasóz qyzmetiniń málimetine súıensek, jastar polıtsııa bólimshesine shaqyryldy.
«Tártip saqshylary olarǵa jolda túrli chellendjder ótkizý sııaqty is-áreketterdiń qaýiptiligin aıtty. Jastarǵa munyń aýyr zardaptarǵa, sonyń ishinde apattar men jaraqattarǵa ákelýi múmkin ekendigi túsindirildi», - delingen aqparatta.
Sonymen qatar polıtsııa tórt júrgizýshini jol qozǵalysy erejeleriniń talaptaryn buzǵany, saǵat 22.00-den tańǵy 9.00-ge deıin tynyshtyqty buzǵany úshin eki bap boıynsha ákimshilik jaýapkershilikke tartty.
