Semeıde jol boıyndaǵy ájethanadan 4 jasar balanyń máıiti tabyldy

Semeı qalasynyń irgesinde jol boıyndaǵy ájethanadan bala máıiti tabylyp, qylmystyq is qozǵaldy, dep habarlaıdy QazAqparat tilshisi.

Beıresmı aqparatqa súıensek, ata-anasy 4 jasar balasyn kútýshige qaltyryp ketken. Biraq anasy úıge kelgende balasy joq bolyp shyqty. Onyń máıitin kútýshiniń kúıeýi sómkege salyp, qala shetindegi ájethanaǵa laqtyrǵan kórinedi. Búldirshinniń naqty neden kóz jumǵany belgisiz.

Polıtsııa oqıǵany rastap, tergeý bastalǵanyn málim etti. 

«Tórt jasar bala ólimi faktisi boıynsha sotqa deıingi tergeý amaldary qolǵa alyndy. Qazirgi ýaqytta kúdikti ustaldy. Qylmystyq is boıynsha birqatar sot-medıtsınalyq saraptama taǵaıyndaldy. Oqıǵanyń barlyq mán-jaıyn anyqtaýǵa baǵyttalǵan is-sharalar kesheni júrgizilýde», - dep habarlady Abaı oblystyq Polıtsııa departamentinen.

Vedomstvo dereginshe, qylmystyq isti tergeý departament pen prokýratýra basshylyǵynyń erekshe baqylaýynda. Qylmystyq-protsestik kodekstiń 201-baby 1-bóligine sáıkes sotqa deıingi tergep-tekserýdiń ózge derekteri jarııa etilmeıdi.