Semeıde joǵalyp ketken 19 jastaǵy boıjetkenniń denesi tabyldy
SEMEI. QazAqparat – Semeı qalasynda iz-tússiz joǵalyp ketken boıjetkenniń denesi tabyldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetinshe, búgin izdestirý jumystary barysynda Bobrovka saıajaı alaby mańyndaǵy Ertis ózeniniń jaǵasynan qyzdyń denesi tabylǵan. Máıittiń iz-tússiz joǵalyp ketken 19 jastaǵy boıjetken ekeni belgili boldy.
«Onyń denesinde zorlyq-zombylyq belgileri joq. Qazirgi ýaqytta saraptama taǵaıyndaldy. Tergeý amaldary jalǵasýda», - dep habarlady vedomstvo ókilderi.
Ózendegi sý deńgeıiniń joǵary bolýyna baılanysty osyǵan deıin bul jerdi tekserý múmkin bolmaǵan. Qyzdyń denesin eriktiler taýypty.
Esterińizge sala ketsek, 3 mamyr kúni úıden shyqqan 2000 jylǵy qyzdyń sol kúıi qaıtyp oralmaǵany habarlanǵan bolatyn.
