Semeıde joǵalyp ketken er adamnyń máıiti tabyldy
SEMEI. KAZINFORM — Abaı oblysynda Semeı qalasynyń 44 jastaǵy turǵynyn izdeý jumystary aıaqtaldy. Er adamnyń máıiti qaraýsyz qalǵan kóliginen ondaǵan shaqyrym jerde daladan tabyldy.
Rınat Ahmetov 6 qarasha kúni tańerteń jaqyndaryna sońǵy ret telefon soqqan. Osydan keıin múlde baılanysqa shyqpaı, iz-tússiz joǵaldy.
Úsh kúnnen soń azamattyń kóligi Ertis ózeniniń jaǵasynan, Pıatıletka, Novovasılevka jáne Alekseevka aýyldary mańynan tabyldy.
Kólik anyqtalǵannan keıin izdeý aýmaǵy edáýir keńeıtildi. Jetýi qıyn dala alqabyn sharlaýǵa aýyr tehnıka tartyldy. Atap aıtqanda, jergilikti turǵyndardyń 12 traktory men jolsyz jerlerde júrýge arnalǵan polıtsııanyń eki kvadrotsıkli kádege jaratyldy.
Іzdeý jumystaryna 60-tan astam polıtsııa qyzmetkeri, onyń ishinde arnaıy jasaqtyń 30 qyzmetkeri, 50 áskerı qyzmetshi jáne Tótenshe jaǵdaılar departamentiniń 10 qutqarýshysy jumyldyryldy. Sondaı-aq eriktiler, marqumnyń týystary men jergilikti turǵyndar kómek kórsetti.
11 qarasha kúni kúndiz er adamnyń máıiti daladan, Novovasılevka aýylynan shamamen 35 shaqyrym jerden tabyldy.
— Dalada júrgizilgen aýqymdy izdestirý jumystary barysynda er adamnyń máıiti anyqtaldy. Aldyn ala málimet boıynsha, ólimge úsip qalý sebep bolýy múmkin. Marqumnyń naqty kóz jumý sebebin anyqtaý úshin sot-medıtsınalyq saraptama taǵaıyndaldy. Er adamnyń týǵan-týystary men jaqyndaryna qaıǵyra kóńil aıtamyz, — dep habarlady Abaı oblysynyń polıtsııa departamentinen.
Qazirgi ýaqytta polıtsııa qyzmetkerleri júrgizýshiniń kólikten shyǵyp, elsiz dalaǵa ketýine deıingi oqıǵalardyń mán-jaıy men hronologııasyn anyqtap jatyr.
Eske salsaq, osyǵan deıin Almaty taýlarynda sheteldik týrıst joǵalǵany habarlanǵan.
