Semeıde jylý qazandyqtaryn jóndeý kezinde bıýdjet qarajaty jymqyrylǵan

Semeı qalasynda jylý qazandyqtaryn jóndeý kezinde bıýdjet qarajatyn jymqyrý faktisi anyqtaldy, dep habarlaıdy QazAqparat tilshisi.

Abaı oblysy ákimdiginiń málimetine súıensek, Semeı qalasyndaǵy «Teplokommýnenergo» memlekettik kommýnaldyq kásiporyn qazandyqtarynyń jylytý maýsymyna daıyndyǵy tekserilgen.

Sonyń barysynda byltyr bıýdjet qarajaty jymqyrylǵany anyqtaldy.

«Oblys ákimdiginiń bastamasymen ekonomıkalyq tergeý jáne UQK óńirlik departamentteri birlesip, oblystyq prokýratýranyń úılestirýimen 2022 jyly qala qazandyqtaryn jóndeý kezinde qoldanysta bolǵan materıaldardy paıdalaný arqyly bıýdjet qarajatyn urlaý faktisin anyqtady. Aımaq basshysy Nurlan Uranhaev arnaıy komıssııa quryp, merdiger uıymǵa jylytý maýsymynda Semeı qalasyn jylýmen jabdyqtaý júıeleriniń úzdiksiz jumysy isteýi úshin jóndeý jumystaryn aıaqtaý merzimderi belgilendi», - delingen aqparatta.

Ázirge naqty qansha qarajat ekeni aıtylmady. Barlyq mán-jaı tergeý aıaqtalǵan soń ǵana belgili bolmaq.