Semeıde «Jigit sultany» baıqaýy ótkizildi
ASTANA. 4 mamyr. QazAqparat - Semeı qalalyq ishki saıasat bóliminiń qoldaýymen «Nur Otan» HDP fılıalynyń «Jas Otan» Jastar qanaty jáne «Salaýat» ShQO Jastar qoǵamdyq birlestigi "Jigit sultany" baıqaýyn ótkizdi.
Oǵan qaladaǵy bilim ordalarynyń stýdentteri qatysty. Saıysqa qatysýshylar ózin-ózi tanystyrý, myltyq atý, qol kúresi, qazaqsha kúres, aýdaryspaq, óner saıysy jáne bata berý bólimderi boıynsha baqtaryn synady. Baıqaýdy tamashalaýǵa kórermender kóp jınaldy. Bul saıystyń maqsaty - halyq arasynan ónerli, aqyldy er azamattardy iriktep, ony jurtshylyqqa tanystyrý, ulttyq ónerdi, salt-dástúrimizdi, tilimiz ben dilimizdi óskeleń urpaqqa nasıhattaý, qazaq jigitteriniń ór minezdiligin, aqyl qaıraty tolysqan, qaıtpas qaısarlyǵyn dáripteý, - deıdi uıymdastyrýshylar.
Baıqaýǵa qatysýshy úmitkerler qoıylǵan sharttardan múdirmeı ótip, ádilqazylar alqasy tarapynan tómendegideı oryndarǵa ıe boldy. «Er kanaty - at» atalymy - Eldos Qajyǵalymov (Qazaq ınnovatsııalyq gýmanıtarlyq zań ýnıversıteti), «Kúsh atasyn tanymas» - Farhat Tashmetov (Qaınar ýnıversıteti), «Men alashtyń Ulymyn» - Aıdos Rahmetýllın (Semeı memlekettik medıtsına ýnıversıteti), «Ónerli órge júzer» - Qýandyq Ibraımov (Semeı memlekettik pedagogıkalyq ınstıtýty), «Quralaıdy kózge atqan» - Ábdildábek Tursynov (Shákárim atyndaǵy Semeı memlekettik ýnıversıteti). Al Áýezov atyndaǵy Semeı pedagogıkalyq kolledjiniń stýdenti Aıdos Tóleýhanov bas júldege qol jetkizip, «Jigit sultany - 2013» atandy.
Baıqaý sońynda jeńimpazdarǵa jáne barlyq qatysýshylarǵa gramotalar men baǵaly syılyqtar tabys etildi.
