Semeıde jertóleden tabylǵan sileýsinniń neden ólgeni belgili boldy
SEMEI. QazAqparat – Semeıdegi bıologııalyq ortalyqtaǵy sileýsindi qasqyr talap óltirdi, dep habarlaıdy QazAqparat.
Bıoortalyqtyń habarlaýynsha, oqıǵa 31 qańtar kúni keshki saǵat 16:00 shamasynda bolǵan.
«Tabıǵat qorǵaý polıtsııasy sileýsindi ýaqytsha osy ortalyqqa bergen bolatyn. Ornalastyratyn oryn bolmaǵan soń ony jyrtqysh ańdar volerine qamadyq. Ol jerde qasqyr turatyn. Qasqyr jińishke ári tar jerge jaıǵasty. Al sileýsin ózi ǵana turatyn oqshaý úıshikte ómir súrdi. Biraq tamaqtandyratyn kezde qasqyrdy ekeýine ortaq irgeles volerge kirgizetinbiz. Óıtkeni onyń turatyn jerinde as-aýqat beretin oryn joq. Al ony qoldan tamaqtandyrý qaýipti», - dep túsindirdi bıologııalyq ortalyqtaǵylar.
Bıoortalyq ákimshiligi sileýsinniń ári qaraıǵy taǵdyry qalaı sheshiletinin kútip jatpaı oǵan qaýipsiz, jaıly jaǵdaı jasaý úshin tıisti materıaldardy izdep, volerdi rekonstrýktsııalaýdy bastap ketken edi.
«Keshki as kezinde úıshiginde jatqan sileýsin aıaǵyn tordan shyǵarǵan, sol sátte as jep jatqan qasqyr onyń aıaǵyn talap tastaǵan, sóıtip aýyr jaraqattady. Sileýsin oqıǵa ornynda óldi», - dep málim etti zoologtar.
Oqıǵaǵa baılanysty tıisti quzyrly organ ókilderinen táýelsiz komıssııa quryldy. Janýardyń óleksesi mal qorymyna kómilgen.
Eske sala keteıik, bul sileýsin 24 qańtarda Semeıdegi jertóleden tabylǵan. Jyrtqysh ań qańǵybas mysyqtarmen qorektenbek bolǵan. Sileýsin ýaqytsha balalar bıologııalyq ortalyǵyna ornalastyrylǵan bolatyn.
