Semeıde jerasty parkınginde bolǵan órtten 60-qa jýyq adam evakýatsııalandy
SEMEI. QazAqparat – Semeıde jerasty parkınginde bolǵan órtten kópqabatty úıdiń turǵyndaryn evakýatsııalaýǵa týra kelgen, dep habarlaıdy QazAqparat tilshisi qalalyq tótenshe jaǵdaılar basqarmasyna silteme jasap.
Vedomstvoda 5 maýsym kúni saǵat 23:00-de pýltqa Ibraev kóshesiniń boıyndaǵy 9 qabatty úıdiń parkınginde 2000 jylǵy «Toyota Land Cruiser» markaly avtokóliktiń janyp jatqany týraly habar kelip túsken. Kóliktiń motorly bóligi janǵany anyqtaldy, jalyn 8 sharshy metr aýmaqqa taralǵan.
«Tútindi úı turǵyndary baıqap, órt sóndirýshilerdi shaqyrǵan. Oqıǵa ornyna bir mınýtta jetken órt sóndirýshiler adamdardy evakýatsııalaýǵa kómek kórsetken. Barlyǵy 57 eresek adam men segiz bala evakýatsııalandy», - dep atap ótti TJB-da.
Osy ýaqytta Semeı qalasynyń № 2 mamandandyrylǵan jasaq bóliminiń órt sóndirýshileri avtokóliktegi jalyndy sóndirip, 20 mınýt ishinde órtti aýyzdyqtady. Órt kezinde qaza bolǵandar men zardap shekkender joq.
